venkatesh iyer: అయ్యర్ ఫైయర్.. ఉన్న కాసేపు ఉతుకుడే ఉతుకుడు – venkatesh iyer smashed 43 runs in 24 balls against mumbai indians in ipl 2022

Trends

కోల్‌కతా ఓపెనర్ వెంకటేశఅయ్యర్ ముంబయిపై బౌండరీల వర్షం కురిపించాడు. క్రీజ్‌లో ఉన్న కాసేపు సిక్సర్లు, ఫోర్లతో ముంబయి ఇండియన్స్ బౌలర్లకి చుక్కలు చూయించాడు. ఈ సీజన్‌ ఆరంభంలో ముంబయితో జరిగిన మ్యాచ్‌లో హాఫ్ సెంచరీతో అదరగొట్టిన వెంకటేశ్ అయ్యర్.. ఆ తర్వాతి మ్యాచ్‌లలో అంతగా రాణించలేకపోయాడు. దాంతో కేకేఆర్ మేనేజ్‌మెంట్ చివరి రెండు మ్యాచ్‌ల‌లో అయ్యర్‌ని బెంచ్‌కే పరిమితం చేసింది. దాంతో ఈరోజు మ్యాచ్‌తో కమ్ బ్యాక్ ఇచ్చిన అయ్యర్ తనలోని ఫైయర్‌ని బయటకి తీశాడు.

ముంబయి డీవై పాటిల్ స్టేడియం వేదికగా సోమవారం రాత్రి ముంబయి ఇండియన్స్, కోల్‌కతా నైట్ రైడర్స్ జట్లు తలపడ్డాయి. ఈ మ్యాచ్‌లో టాస్ గెలిచిన ముంబయి ఇండియన్స్ జట్టు కెప్టెన్ రోహిత్ శర్మ బౌలింగ్ ఎంచుకోగా.. కోల్‌కతా నైట్ రైడర్స్ జట్టు బ్యాటింగ్‌కి వచ్చింది. చివరి రెండు మ్యాచ్‌లకు దూరంగా ఉన్న వెంకటేశ్ అయ్యర్, ఐదు మ్యాచ్‌లలో పక్కనబెట్టిన అంజిక్య రహానేను ముంబయితో మ్యాచ్ సందర్భంగా కేకేఆర్ మళ్లీ బరిలోకి దింపింది.

వెంకటేశ్ అయ్యర్ ఫామ్‌ని సవాల్ చేస్తూ కేకేఆర్ మేనేజ్‌మెంట్ చివరి రెండు మ్యాచ్‌లలో పక్కన పెట్టడంతో ముంబయిపై ఆరంభం నుంచే రెచ్చిపోయి ఆడాడు. 24 బంతులు ఎదుర్కొన్న వెంకటేశ్ అయ్యర్ నాలుగు సిక్సర్లు, మూడు ఫోర్లతో 43 పరుగులు చేశాడు. కుమార కార్తికేయ వేసిన ఆరో ఓవర్‌లో 4, 2, 6 బాదిన అయ్యర్.. నాలుగో బంతిని కూడా బౌండరీ తరలించేందుకు ప్రయత్నించి థర్డ్ మ్యాన్‌లో ఫీల్డింగ్ చేస్తున్న డానియల్ శామ్స్‌కి క్యాచ్ ఇచ్చి వెనుదిరిగాడు. ఈ సీజన్‌లో మొత్తం 10 మ్యాచ్‌లు ఆడిన వెంకటేశ్ అయ్యర్ 50 బెస్ట్‌తో 152 పరుగులు చేశాడు.

https://telugu.samayam.com/sports/cricket/iplt20/news/venkatesh-iyer-smashed-43-runs-in-24-balls-against-mumbai-indians-in-ipl-2022/articleshow/91447266.cms