Krishna Vrinda Vihari Movie Review, Rating {2.5/5} – కృష్ణ వ్రింద విహారి మూవీ రివ్యూ, రేటింగ్ {2.5/5}

Trends

నాగ శౌర్య హీరోగా కృష్ణ వ్రింద విహారి అనే చిత్రం నేడు (సెప్టెంబర్ 23) ప్రేక్షకుల ముందుకు వచ్చింది. తన సొంత బ్యానర్ ఐరా క్రియేషన్స్ మీద నాగ శౌర్య తీసిన ఈ చిత్రం ఆడియెన్స్‌ను మెప్పించిందా? డైరెక్టర్ అనీష్ ఆర్ కృష్ణ టేకింగ్ జనాలను ఆకట్టుకుందా? లేదా? అన్నది చూద్దాం.

కథ
అమృతవల్లి (రాధిక శరత్ కుమార్) శివగామి టైపు. ఊర్లో ఆమె చెప్పిందే శాసనం. ఆమె చెబితే జరగాల్సిందంతే. ఆమె ధాటికి భయపడి ఊర్లోని అమ్మాయిలంతా కూడా కృష్ణ (నాగ శౌర్య)ను అన్నయ్య అని పిలుస్తుంటారు. కృష్ణను ఎంతో పద్దతిగా పెంచుతుంది అమృతవల్లి. అలాంటి కృష్ణ సిటీకి వస్తాడు. ఉద్యోగం చేస్తాడు. అక్కడే వ్రింద (షెర్లీ సెటియా)ను చూసి ఇష్టపడతాడు. అయితే వ్రిందకు పిల్లలు పుట్టరనే సమస్య ఉంటుంది. అయినా సరే పెళ్లి చేసుకుందామని కృష్ణ అంటాడు. కానీ అమృతవల్లి మాత్రం చనిపోయిన తన తల్లి కృష్ణ కడుపులో పుడుతుందని ఆశపడుతుంది. ఇలాంటి సమయంలో కృష్ణ ఆడిన అబద్దం ఏంటి? వ్రిందను పెళ్లి చేసుకునేందుకు కృష్ణ పడ్డ పాట్లు ఏంటి? పెళ్లి అయ్యాక కృష్ణ ఆడిన అబద్దాల వల్ల ఎదురైన సమస్యలు ఏంటి? చివరకు కృష్ణ వ్రిందల సంసారం ఎలా సాగింది? అనేది కథ.

నటీనటులు
కృష్ణ పాత్రలో నాగ శౌర్య మెప్పిస్తాడు. కానీ బ్రాహ్మణ నేపథ్యం కావడంతో ఇందులో కొన్ని పాత్రలు కావాలనే కృతకంగా మాట్లాడినట్టు అనిపిస్తుంది. నాగ శౌర్య, రాధిక, జయ ప్రకాష్ పలికే మాటలు, వారి యాస ఏమంతగా నప్పదు. కావాలనే మాట్లాడినట్టుగా ఉంటుంది తప్పా.. ఓ ఫ్లోలా అనిపించదు. షెర్లీ సెటియా తెరపై అందంగా కనిపిస్తుంది. కానీ అన్నింటికి ఒక ఎక్స్‌ప్రెషన్ పెట్టినట్టు అనిపిస్తుంది. ఇక బ్రహ్మాజీ, వెన్నెల కిషోర్, సత్య, రాహుల్ రామకృష్ణ,అన్నపూర్ణమ్మ ఇలా అందరూ ప్రేక్షకులను నవ్వించేస్తారు.

విశ్లేషణ
కృష్ణ వ్రింద విహారి సినిమాలోని పాయింట్ కొత్తదేమీ కాదు. కథనం చూస్తుంటే ఇది ఎప్పటి కాలం నుంచో వస్తోన్న ఫార్మాట్‌లానే అనిపిస్తుంది. అయితే ఇందులోని లైన్, కొన్ని సీన్లు అంటే సుందరానికీ సినిమాలా ఉంటాయి. అందులో ఇందులో సేమ్ సమస్యను, సేమ్ అబద్దాన్ని వాడుకుంటారు హీరోలు. అలా ఈ సినిమాతో ఆ సినిమాకు కచ్చితంగా పోలికలు వస్తాయి.

కానీ ట్రీట్మ్ంట్ పరంగా పూర్తిగా దానికి భిన్నంగా ఉంటాయి. ఫస్ట్ హాఫ్‌లో కథను అంత ఆసక్తికరంగా మల్చలేకపోయారనిపిస్తుంది. లవ్ సీన్స్ మరీ రొటీన్‌గా అనిపిస్తాయి. కామెడీ అక్కడక్కడా వర్కవుట్ అయింది. ఇక ద్వితీయార్థంలోనే అసలు సంక్లిష్టత ఉంటుంది. భార్యాభర్తలు, అత్తా కోడలు, భార్యకు తల్లికి మధ్యలో నలిగే కొడుకు ఇలా చాలా ఫన్ క్రియేట్ అయింది.

ఆ సీన్లకు థియేటర్లో ప్రేక్షకులు కచ్చితంగా నవ్వేస్తారు. అయితే ఆ తరువాత వచ్చే సీన్ ఏంటన్నది మాత్రం ప్రేక్షకుడు ఇట్టే పసిగట్టేస్తాడు. కథనంలో ఏ మాత్రం ఆసక్తిగానీ, ఉత్సుకత గానీ ఉండదు. ఇక క్లైమాక్స్‌లో వెన్నెల కిషోర్ ప్లస్ అయింది. థియేటర్ నుంచి బయటకు వచ్చేటప్పుడు నవ్వులతోనే వస్తారు.

మ్యూజిక్, బ్యాక్ గ్రౌండ్ స్కోర్ అదిరిపోయాయి. ఓ రెండు పాటలు బాగున్నట్టుగా అనిపిస్తాయి. ఇక డైలాగ్స్ అయితే కొన్ని అంటే సుందరానికీ సినిమాలో ఉన్నట్టుగానే అనిపిస్తాయి. కెమెరాపనితనం బాగుంది. నాగ శౌర్య, షెర్లీని చక్కగా చూపించారు. ఎడిటింగ్, ఆర్ట్, నిర్మాణ విలువలు అన్నీ కూడా చక్కగా కుదిరాయి.

చివరగా.. కృష్ణ వ్రిందా విహారి.. సరదాగా నవ్వుకోవచ్చు ఓసారి

https://telugu.samayam.com/telugu-movies/movie-review/naga-shaurya-krishna-vrinda-vihari-movie-review-and-rating/moviereview/94391868.cms